Një aksident i rëndë në hidrocentralin Ritom në Piotta të kantonit Ticino ka shkaktuar një operacion të madh të ekipeve të emergjencës, ndërsa shkaqet e incidentit ende po hetohen.
Një incident i rëndë ka ndodhur të mërkurën paradite në hidrocentralin Ritom në Piotta, në kantonin Ticino. Raportimet e para flisnin për një shpërthim, ndërsa Policia Kantonale e Ticinos e ka konfirmuar ngjarjen si një aksident të rëndë në punë.
Si pasojë, dy persona kanë pësuar lëndime të rënda. Sipas informacioneve të para, një pjesë e objektit është shembur ose dëmtuar gjatë incidentit, shkruan 20min.ch, transmeton albinfo.ch.
Ngjarja ka ndodhur pak pas orës 09:30 dhe ka shkaktuar një mobilizim të madh të shërbimeve të emergjencës. Në vendngjarje kanë ndërhyrë zjarrfikësit e Biascas, ekipet e shpëtimit Tre Valli dhe Rega, ndërsa policia ka izoluar zonën.
Shkaku i aksidentit nuk dihet ende dhe autoritetet kanë nisur hetimet për të përcaktuar rrethanat e sakta. Edhe pse fillimisht u raportua për shpërthim, informacionet e mëvonshme të policisë nuk e kishin konfirmuar ende përfundimisht këtë si shkakun e incidentit.
Hidrocentrali në Piotta është një objekt historik më shumë se 100-vjeçar, i ndërtuar nga Hekurudhat Federale Zvicerane (SBB). Impianti aktual pritet të zëvendësohet nga një hidrocentral i ri deri në vitin 2027.
