Donald Trump e ka paralajmëruar Tajvanin kundër shpalljes zyrtare të pavarësisë nga Kina.
“Nuk po kërkoj që dikush të bëhet i pavarur”, tha presidenti amerikan për Fox News të premten, në fund të samitit të tij dy-ditor me homologun e tij kinez Xi Jinping në Pekin.
Më parë Trumpi tha se “nuk kishte marrë asnjë angazhim në asnjë mënyrë” në lidhje me ishullin vetëqeverisës – të cilin Kina e pretendon si pjesë të territorit të saj dhe nuk e ka përjashtuar marrjen me forcë, raporton BBC.
SHBA-të e kanë mbështetur prej kohësh Tajvanin, duke përfshirë edhe detyrimin me ligj për t’i siguruar atij një mjet vetëmbrojtjeje, por shpesh i është dashur ta përshtasë këtë aleancë me ruajtjen e një marrëdhënieje diplomatike me Kinën.
Qëndrimi i vendosur i Uashingtonit është se nuk e mbështet pavarësinë e Tajvanit, me lidhjet e vazhdueshme me Pekinin që varen nga pranimi i tij se ekziston vetëm një qeveri kineze.
Shumë tajvanezë e konsiderojnë veten pjesë të një kombi të veçantë – megjithëse shumica janë në favor të ruajtjes së status quo-së në të cilën Tajvani as nuk shpall pavarësinë nga Kina dhe as nuk bashkohet me të.
Në intervistën e tij me Fox News, Trump përsëriti se politika e SHBA-së për këtë çështje nuk kishte ndryshuar.
“E dini, ne duhet të udhëtojmë 9,500 milje (15,289 km) për të luftuar një luftë. Unë nuk po kërkoj këtë. Dua që ata të qetësohen. Dua që Kina të qetësohet.”
Në fluturimin e kthimit për në Uashington, presidenti amerikan u kishte thënë gazetarëve se ai dhe Xi kishin folur “shumë” për ishullin, por tha se kishte refuzuar të diskutonte nëse SHBA-ja do ta mbronte atë.
