Autoritetet amerikane të sigurisë u kanë rekomanduar pronarëve të 720,796 automjeteve BMW që t’i parkojnë ato jashtë dhe larg ndërtesave, pasi një defekt elektrik mund të shkaktojë zjarr, sipas dokumenteve të tërheqjes nga tregu.
Administrata Kombëtare e Sigurisë së Trafikut në Autostrada (NHTSA) bëri të ditur se tërheqja nga tregu lidhet me një lidhës elektrik të pompës së ujit, i cili mund të lejojë depërtimin e ujit dhe të shkaktojë një qark të shkurtër.
“Pronarëve u këshillohet t’i parkojnë automjetet e tyre jashtë dhe larg ndërtesave derisa të përfundojë ndërhyrja për zgjidhjen e problemit që lidhet me tërheqjen nga tregu”, tha agjencia në një letër të datës 12 nëntor, me të cilën konfirmoi marrjen e njoftimit për tërheqjen nga tregu të BMW-së.
Kjo fushatë zëvendëson tërheqjen nga tregu të vitit 2024, e cila përfshinte të njëjtat automjete. Sipas NHTSA-së, pronarët, automjetet e të cilëve janë riparuar në kuadër të asaj fushate, do të duhet t’i nënshtrohen edhe ndërhyrjes së re.
Në dokumentacionin e paraqitur, BMW bëri të ditur se degradimi i materialit të lidhësit mund të lejojë depërtimin e lagështisë në pompë, duke rritur rrezikun e mbinxehjes dhe, në raste të rralla, të zjarrit.
Riparimi i mëparshëm përfshinte instalimin e një mbrojtëseje për të devijuar lëngun larg lidhësit, kontrollimin e lidhësit dhe instalimeve elektrike, si dhe zëvendësimin e komponentëve të dëmtuar, aty ku ishte e nevojshme.
Megjithatë, një shqyrtim i kryer në janar evidentoi raste të tjera të mbinxehjes ose mbingarkesës termike në automjetet që i ishin nënshtruar tashmë këtij riparimi. Sipas përshkrimit të BMW-së për hetimin e saj, testimet e mëvonshme zbuluan brishtësi të materialit dhe çarje në lidhës.
BMW vendosi të nisë tërheqjen e re nga tregu më 28 tetor dhe ia dorëzoi raportin NHTSA-së më 4 nëntor.
Deri në datën e marrjes së këtij vendimi, kompania ishte në dijeni të rreth 10 incidenteve në SHBA, të cilat ishin ose mund të kishin lidhje me defektin. Ajo bëri të ditur se nuk kishte marrë asnjë raport për aksidente apo lëndime të lidhura me këtë problem.
Tërheqja nga tregu përfshin disa automjete të modeleve 3 Series, 5 Series dhe Z4 të viteve 2012–2016; modelet X1 të viteve 2012–2015; X3 të viteve 2013–2017; X4 të viteve 2015–2018; si dhe modelet X5 xDrive40e të viteve 2016–2018.
Gjithashtu, preken disa modele 2 Series Coupé, 3 Series Sportswagon, 328xi Gran Turismo, 4 Series Coupé dhe Convertible të viteve 2014–2016, si dhe modelet 2 Series Convertible dhe 4 Series Gran Coupé të viteve 2015–2016.
Riparimi është ende në fazën e zhvillimit dhe do të kryhet pa pagesë në qendrat e autorizuara të BMW-së.
Sipas NHTSA-së, letrat njoftuese për pronarët pritet të dërgohen me postë gjatë muajit dhjetor. Numrat e identifikimit të automjeteve (VIN), të përfshira në këtë tërheqje nga tregu me numër 26V733, pritet të mund të kërkohen në faqen zyrtare të agjencisë duke filluar nga 25 dhjetori.
