Sipas informacioneve të para, zjarri ka përfshirë disa goma të vjetra në deponi, e cila ndodhet në afërsi të rrugës kryesore të zonës.
Për situatën ka folur Abdusamed Shkodra, komandant i Brigadës së Zjarrfikësve për zonën e Prishtinës, i cili ka bërë të ditur se ekipet e zjarrfikësve janë nisur drejt vendit të ngjarjes.
“Janë kallë disa goma të vjetra në deponi. Ekipet e zjarrfikësve janë nisur drejt vendit të ngjarjes për të intervenuar”, ka deklaruar Shkodra.
Nga vendi i ngjarjes është parë një sasi e madhe tymi i zi, i cili është përhapur në zonën përreth.
Deri më tani nuk raportohet për persona të lënduar apo dëme të tjera materiale.
Ekipet e zjarrfikësve po punojnë për lokalizimin dhe shuarjen e zjarrit.
Ende nuk dihen shkaqet e shpërthimit të zjarrit.
