Ankesat për çmime të fryra në plazhet e Shëngjinit kanë detyruar Bashkinë e Lezhës të reagojë publikisht. Kryetari i Bashkisë, Pjerin Ndreu, ka publikuar tarifat maksimale të miratuara për shezllonet dhe gazebot, duke paralajmëruar se çdo subjekt që kërkon më shumë po shkel rregullat dhe duhet të denoncohet.
Reagimi erdhi pas raportimeve të shumta nga pushues, të cilët pretendojnë se në disa plazhe u janë kërkuar pagesa shumë më të larta se tarifat zyrtare.
Një qytetar tregon se pasi refuzoi të paguante çmimin e kërkuar dhe kontaktoi drejtpërdrejt Kryetarin e Bashkisë, menaxheri i plazhit u detyrua të tërhiqej dhe të pranonte çmimin e lejuar.
Sipas njoftimit zyrtar, çmimet maksimale variojnë nga 300 deri në 500 lekë për shezllonet bazike, 700 deri në 1.000 lekë për shezllonet prej druri dhe 1.500 deri në 2.500 lekë për gazebot familjare, në varësi të zonës.
Bashkia u bën thirrje të gjithë pushuesve që të mos pranojnë të paguajnë tarifa mbi këto vlera dhe të denoncojnë menjëherë çdo rast abuzimi, duke vënë në dispozicion edhe numrat e kontaktit të zyrtarëve përgjegjës.
Mesazhi është i qartë: kush kërkon më shumë se çmimet e miratuara, rrezikon denoncim dhe përballje me ligjin.
