Shtetet e Bashkuara i kanë pezulluar kontributet financiare në Organizatën Botërore të Tregtisë, i thanë agjencisë së lajmeve “Reuters” tri burime, përderisa administrata e presidentit Donald Trump po i shton përpjekjet për t’i zvogëluar shpenzimet qeveritare.

Administrata e Trumpit po tërhiqet nga institucione globale që i sheh në kundërshtim me politikat e saj ekonomike “Amerika e Para”. Qeveria planifikon të tërhiqet nga disa institucione, si Organizata Botërore e Tregtisë, dhe i ka zvogëluar kontributet në disa të tjera si pjesë e një rishikimi të gjerë të shpenzimeve federale, raporton agjencia “Reuters”.

Organizata me seli në Gjenevë kishte buxhet vjetor prej 205 milionë frangash zvicerane vitin e kaluar. Shtetet e Bashkuara pritej të kontribuonin me rreth 11 për qind të kësaj shume duke u bazuar në një sistem tarifash që është proporcional me përqindjen e vendit në tregtinë globale, sipas dokumenteve publike të OBT-së.

Një delegat i Shteteve të Bashkuara tha në një takim buxhetor të OBT-së më 4 mars se pagesat e vendit të tij për buxhetet e viteve 2024 e 2025 për këtë organizatë ishin pezulluar, në pritje të një rishikimi të kontributeve për organizata ndërkombëtare dhe se do ta njoftonte OBT-në për rezultatin në një datë të pasaktësuar, thanë dy burime tregtare me njohuri të drejtpërdrejtë rreth këtij takimi.

Një burim tjetër e konfirmoi përshkimin e dy burimeve dhe tha se Organizata Botërore e Tregtisë do të dilte me një plan B në rast të pauzimit të gjatë të fondeve, pa dhënë hollësi.