Ukraina e ka stabilizuar vijën e frontit dhe e ka “thyer aftësinë e Rusisë për të përparuar”, duke vrarë aq shumë ushtarë të saj, ka thënë në një intervistë për BBC-në ish-komandanti i përgjithshëm i Ukrainës.
Gjenerali Oleksandr Syrskyi i bëri këto komente në një intervistë ekskluzive, të parën që nga largimi i tij dramatik nga detyra gjatë verës.
Ai foli për shkarkimin e tij, duke kundërshtuar kritikët që e cilësonin tepër “të shkollës së vjetër” për të komanduar forcat e reja të Ukrainës, të pajisura me teknologji të avancuar.
Ai gjithashtu kundërshtoi akuzat e ushtarëve që kishin shërbyer më parë nën komandën e tij, të cilët i thanë BBC-së se u ishte urdhëruar të qëndronin në pozicionet e tyre edhe kur ishin pothuajse të rrethuar nga rusët, gjë që çoi në humbje të mëdha.
Syrskyi tha se humbjet e përgjithshme të Moskës në luftë ishin gjashtë herë më të larta se ato të Ukrainës. “Nëse numëron vetëm të vrarët, atëherë shifra shkon deri në 11 herë më shumë”, shtoi ai.
As Rusia dhe as Ukraina nuk i publikojnë zyrtarisht shifrat e të vrarëve të tyre. Ushtria ukrainase thotë se në shtator u shkaktoi ushtarëve rusë humbje rekord këtë vit, megjithëse kjo nuk mund të verifikohet.
Drejtuesit e inteligjencës britanike vlerësojnë se Rusia ka humbur rreth gjysmë milioni ushtarë të vrarë në Ukrainë që nga nisja e pushtimit të saj në shkallë të plotë më 2022. Ndërkohë, Qendra për Studime Strategjike dhe Ndërkombëtare me bazë në SHBA vlerëson se deri në qershor 2026, Ukraina kishte humbur deri në 150.000 ushtarë të vrarë.
Ai thotë se kjo diferencë në numrin e të vrarëve, së bashku me përparimet teknologjike dhe një strategji të sulmit ndaj pikave të dobëta në vijat ruse, ndërkohë që në pjesë të tjera pengohet përparimi i tyre, shpjegon ngërçin aktual në front.
Në gjashtë muajt e parë të vitit 2026, Rusia arriti të pushtonte gjithsej 61 kilometra katrorë, tha gjenerali. “Kjo është një shenjë se vija e frontit është stabilizuar”.
Instituti për Studimin e Luftës (ISW) e ka konfirmuar gjithashtu këtë prirje. Një nga raportet e tij të fundit thotë se në shtator 2026, Moska humbi më shumë territor sesa pushtoi.
