Europa Juglindore përballet me një tjetër valë moti të ashpër.
Meteorologët e European Storm Forecast Experiment kanë lëshuar paralajmërim të nivelit 2 për pjesë të Bullgarisë, Rumanisë, Greqisë dhe Turqisë, ku gjatë 24 orëve të ardhshme priten stuhi të forta me breshër të madh, erëra të fuqishme dhe reshje intensive.
Sipas parashikimit, rreziku më i lartë për tornado paraqitet në lindje të Bullgarisë dhe në lindje të Rumanisë. Ekspertët shpjegojnë se përplasja e një fronti të ftohtë me masat shumë të nxehta dhe të lagështa të ajrit mbi Ballkan krijon kushte ideale për zhvillimin e superqelizave, të afta të prodhojnë breshër të madh, erëra shkatërruese dhe tornado.
Zona e rrezikut shtrihet edhe në veriun e Greqisë dhe veriperëndimin e Turqisë, ku priten stuhi të organizuara me breshër, erëra të forta dhe reshje të dendura. Ndërkohë, një paralajmërim i nivelit 1 është lëshuar edhe për pjesë të Italisë jugore dhe Spanjës lindore, ku priten stuhi të izoluara me breshër dhe reshje të forta.
Sipas meteorologëve, moti i paqëndrueshëm lidhet me një front të ftohtë që po zbret drejt Europës Juglindore, ndërsa masat e nxehta subtropikale vijojnë të dominojnë rajonin, duke favorizuar zhvillimin e fenomeneve të rrezikshme atmosferike.
