Artan Behrami ka kritikuar kryeministrin në detyrë, Albin Kurti, për mungesën e një reagimi publik pas ndarjes nga jeta të Sahit Jasharit, komandantit, bashkëluftëtarit dhe familjarit të afërt të Adem Jasharit.
Përmes një deklarate, Behrami tha se deri më tani Kurti nuk ka shprehur ngushëllime publike për vdekjen e Sahit Jasharit, duke e cilësuar këtë si mungesë empatie dhe respekti institucional ndaj një figure që, sipas tij, lidhet drejtpërdrejt me historinë e rezistencës dhe luftës çlirimtare të Kosovës.
“Heshtja ndaj një figure të tillë është mungesë empatie dhe respekti institucional. Përballë një humbjeje të madhe për një familje që mbart një pjesë të rëndësishme të historisë së Kosovës, mosreagimi është i papranueshëm”, ka deklaruar Behrami.
Ai theksoi se Sahit Jashari ishte pjesë e historisë kombëtare të sakrificës, qëndresës dhe luftës për liri, duke shtuar se respekti për kontributin e tij duhet të tejkalojë ndarjet politike.
Behrami ka shprehur kritika edhe ndaj reagimit të ushtrueses së detyrës së Presidentes, Albulena Haxhiu, duke e cilësuar atë si të ftohtë. Sipas tij, në reagimin zyrtar nuk janë theksuar gradat ushtarake, meritat në luftë dhe pesha historike e sakrificës së Sahit Jasharit.
“Respekti për ata që kanë kontribuar për lirinë e vendit nuk duhet të jetë çështje bindjesh politike, por një minimum i kujtesës dhe mirënjohjes kombëtare”, ka deklaruar Behrami.
