Çmimet e pronave të banimit në Kosovë në tremujorin e parë të vitit 2026 janë rritur për 5.3 për qind krahasuar me tremujorin e parë të vitit të kaluar.
Tregu i banimit në Kosovë po vazhdon të shtrenjtohet nga viti në vit, me çmimet e pronave që po arrijnë nivele gjithnjë më të larta.
Sipas të dhënave të publikuara në Indeksin e Çmimeve të Pronave të Banimit, në tremujorin e parë të vitit 2026 çmimet e banesave dhe pronave të banimit janë rritur për 5.3 për qind krahasuar me tremujorin e parë të vitit 2025.
Rritje është regjistruar edhe krahasuar me tremujorin e katërt të vitit 2025, ku çmimet kanë shënuar ngritje prej 2.4 për qind vetëm brenda një tremujori.
Të dhënat tregojnë se trendi i rritjes së çmimeve po vazhdon prej vitesh, ndërsa ndryshimet nuk janë të njëjta në të gjitha rajonet e vendit.
Në Rajonin e Prishtinës, ku vitet e fundit janë përqendruar ndërtimet më të mëdha të komplekseve banesore dhe kërkesa më e lartë për banim, rritja vjetore e çmimeve në tremujorin e parë të vitit 2026 ishte 1.4 për qind krahasuar me të njëjtën periudhë të vitit të kaluar.
Megjithatë, rritja më e madhe është regjistruar në rajonet tjera të Kosovës.
Sipas raportit, jashtë Rajonit të Prishtinës çmimet e pronave të banimit janë rritur për 12.3 për qind krahasuar me tremujorin e parë të vitit 2025.
Raporti përfshin edhe ndryshimet vjetore të Indeksit të Çmimeve të Pronave të Banimit për periudhën nga TM1 2019 deri në TM1 2026, ku shihet se tregu i banimit në Kosovë ka vazhduar të lëvizë me trend rritës pothuajse në çdo vit.
Po ashtu janë publikuar edhe vlerat e indeksit, ndryshimet tremujore, ndryshimet vjetore dhe ndryshimet mesatare vjetore për periudhën TM1 2018- TM1 2026, të cilat paraqesin lëvizjet e vazhdueshme të çmimeve të banesave dhe pronave të banimit në vend./gazetametro.net
