Inxhinieri dhe sipërmarrësi i njohur, Ermal Sadiku, i është bashkuar Lidhjes Demokratike të Kosovës.
Kryetari i LDK-së, Lumir Abdixhiku, ka lavdëruar karrierën profesionale të Sadikut, duke theksuar se:
“Si themelues i disa prej kompanive më të suksesshme të sektorit ICT, ai ka kontribuar drejtpërdrejt në rritjen e industrisë vendore të teknologjisë, duke krijuar vende pune me standarde ndërkombëtare dhe duke dëshmuar se edhe nga Kosova mund të ndërtohen produkte që konkurrojnë denjësisht në tregun global”, ka shkruar ai.
Abdixhiku ka shtuar se aderimi i Sadikut në LDK përbën një forcim të ekipit, pasi ai sjell “profesionalizëm, integritet e përvojë”.
“Ai vjen si një adresë e tashme politike dhe e ardhme e sektorit më me potencial në Kosovë”, u shpreh kryetari i LDK-së.
Ermal Sadiku, bashkëthemelues i LinkPlus, ka shërbyer si ligjërues në fakultet, si kryetar i Bordit të STIKK dhe vazhdon të jetë mentor e trajner i shumë të rinjve që synojnë karrierë në fushën e teknologjisë.