kfvanews
Reshjet e fuqishme të shiut shkaktuan shembjen e një pjese të murit ndarës të ndërtuar nga Izraeli në jug të Bregut Perëndimor, të martën, raportoi Anadolu.
Sipas tyre, muri u rrëzua pjesërisht si pasojë e shirave të rrëmbyeshëm që sollën përmbytje të menjëhershme në jug të Hebronit. Një video e publikuar nga terreni tregonte shkatërrimin e plotë të një segmenti të murit prej betoni.
Ndërtimi i murit ndarës nisi në vitin 2002, me qëllimin për të ndarë Bregun Perëndimor të okupuar nga territori i Izraelit. Dy vite më vonë, në 2004, Gjykata Ndërkombëtare e Drejtësisë dha një opinion këshillimor duke e cilësuar murin si të paligjshëm.
Shirat e dendura shkaktuan gjithashtu rrëshqitje dheu që penguan qarkullimin në rrugët kryesore në perëndim të Ramallahut, në zonat qendrore të Bregut Perëndimor. Korrespondenti i Anadolu raportoi se disa automjete u dëmtuan nga përmbytjet, megjithëse nuk ka njoftime për të lënduar.
“Zona ka përjetuar sasi të mëdha reshjesh brenda pak orësh, në një hapësirë të gjerë”, tha meteorologu palestinez, Qussai Halaika, në një deklaratë.
Ai shtoi se pjesët perëndimore të Jerusalemit, Betlehemit dhe Hebronit pësuan reshje të konsiderueshme, ndërsa ato u pakësuan më tej drejt lindjes.
Territoret palestineze prej disa ditësh po përballen me kushte të paqëndrueshme atmosferike, të shoqëruara me shi të dendur dhe erëra të forta, ndërsa autoritetet kanë paralajmëruar për rrezikun e përmbytjeve në zonat e ulëta dhe mundësinë e shembjes së mëtejshme të rrugëve.
