kfvanews
Një tentim-vrasje ka ndodhur mbrëmë rreth mesnatës në Prizren, ku një burrë është plagosur në të dy këmbët sa ishte duke lëvizur me veturën e tij, nga një i dyshuar që po lëvizte me një trotinet elektrik.
Rastin e ka konfirmuar zëdhënësi i Policisë për Rajonin e Prizrenit, Shaqir Bytyqi, i cili bëri me dije se viktima është një 28-vjeçar me inicialet Gj.Sh, i cili ndodhet jashtë rrezikut për jetë.
Ai bëri me dije se i dyshuari është larguar nga vendngjarja me trotinet dhe akoma nuk është identifikuar.
“Më datë 19.11.2025, rreth orës 23:15, në rrugën “Ismail Kryeziu” në Prizren, patrulla policore gjatë patrullimit ka dëgjuar krisma armësh dhe ka hasur një person të plagosur nga arma e zjarrit. Viktima, Gj. Sh., mashkull 28 vjeçar nga Prizreni, ka pësuar plagosje në të dy këmbët dhe ndodhet jashtë rrezikut për jetë. Sipas informacioneve të para, dyshohet se Viktima ishte në lëvizje me automjet kur një person ka shtënë me armë në drejtim të tij dhe më pas është larguar nga vendi i ngjarjes me një trotinet elektrik. Viktima është dërguar në Spitalin Rajonal të Prizrenit për trajtim mjekësor. Në konsultim me prokurorin, është filluar rasti “Vrasje në tentativë” dhe hetimet po zhvillohen nga Sektori Rajonal i Hetimeve i DRP Prizren. Policia ka mbledhur prova nga vendi i ngjarjes, ka intervistuar viktimën dhe dëshmitarët, dhe po punon në identifikimin dhe arrestimin e të dyshuarit”, ka deklaruar Bytyqi.
