kfvanews
Pas dështimit për votimin e Qeverisë së re të dielën, tani përgjegjësia ka kaluar tek Presidentja Vjosa Osmani, e cila pritet t’i ftojë partitë politike për konsultime. Në konsultat që do t’i ketë, Osmani do të bëjë thirrje për kompromis politik.
Këshilltari për media i Osmanit, Bekim Kupina, ka deklaruar për Reporteri.net se Presidentja do t’i inkurajojë partitë politike të bashkëpunojnë për ta shmangur çdo bllokadë.
Ajo do të theksojë edhe rëndësinë e miratimit të buxhetit dhe Planit të Rritjes.
“Presidentja Osmani, në konsultat që do t’i zhvillojë me partitë politike, do ta potencoj rëndësinë e miratimit të Buxhetit për vitin 2026 si dhe miratimin e Planit të Rritjes, si akte të domosdoshme për stabilitetin institucional dhe funksionimin normal të shtetit si dhe për zhvillimin ekonomik të vendit tonë. Presidentja do të bëjë thirrje për një kompromis politik, nëpërmjet të cilit do të garantohet interesi i Kosovës dhe i qytetarëve të saj, si dhe të sigurohet rruga përpara për avancimin e vendit. Në këtë kuadër, Presidentja do t’i inkurajojë partitë politike të bashkëpunojnë për ta shmangur çdo bllokadë që mund të ndikojë negativisht në mirëqenien e qytetarëve dhe në funksionimin e institucioneve të Republikës së Kosovës”, ka deklaruar Kupina.
Ai ka deklaruar se Osmani do t’i ftoj partitë brenda afatit kushtetues dhe në përputhje me përgjegjësitë kushtetuese.
Ndryshe, partitë kanë deklaruar dje se rruga e vetme mbeten zgjedhjet e jashtëzakonshme parlamentare.
Madje, Kreu i PDK’së, Memli Krasniqi tha se nuk do të marrin mandatin për krijimin e Qeverisë, duke theksuar se asnjë nga partitë nuk i ka numrat.
Ai tha se nuk ka nevojë fare të pritet afati 10 ditor dhe se Osmani duhet t’i ftojë në takim e të shkohet në zgjedhje.
