kfvanews
Njësitë policore të Rajonit të Mitrovicës Veri kanë kryer një operacion në fshatin Mekinicë të Leposaviqit, ku gjatë kontrollit në një shtëpi janë sekuestruar armë, municion dhe pajisje të tjera ilegale.
Ngjarja nisi pas raportimit të gruaje më 15 tetor, e cila deklaroi se ishte kanosur nga bashkëshorti i saj, i cili gjithashtu posedonte armë.
Gjatë kontrollit në shtëpinë e të dyshuarit në fshatin Mekinicë të Leposaviqit, policia ka sekuestruar një sërë armësh dhe pajisjesh ilegale, përfshirë 3 pushkë automatike AK-47, 1 pushkë ajrore, 1 revolver, 1 shkrepës në formë revolveri, 55 fishekë, 1 bajonetë, 2 thika, 5 karikatorë për armën AK-47, 1 karikator për revolverin, 1 këllëf për revolverin, 1 jakë ushtarake dhe 2 këmisha të policisë së Serbisë.
Ndaj të dyshuarit S.T., 49 vjeç, ekzistonte një urdhër mbrojtës i Gjykatës Themelore në Mitrovicë që nga data 15.10.2024 deri më sot. Ai është arrestuar dhe ndaj tij është iniciuar rasti për kanosje, mosrespektim të urdhrit të gjykatës dhe mbajtje të paautorizuar të armëve, duke u dërguar në mbajtje për 48 orë.
Gjatë kontrollit, prindi i të dyshuarit, N.T., 70 vjeç, ka deklaruar se disa nga armët dhe uniformat i përkasin atij. Kundrejt tij është iniciuar rasti për mbajtje të paautorizuar të armëve, por pas intervistimit është liruar sipas procedurave të rregullta.
Policia Rajonale Mitrovicë Veri rikujton qytetarët për rëndësinë e bashkëpunimit dhe i fton ata të raportojnë çdo aktivitet të dyshimtë për të siguruar rendin dhe sigurinë publike.
