kfvanews
Sindikata e Bashkuar e Arsimit, Shkencës dhe Kulturës ka bërë të ditur se me organizimin e tyre ka nisur sot pushimi veror për grupin e parë të anëtarëve të sindikatës, të cilët janë nisur për në bregdetin shqiptar.
Në njoftim thuhet se edhe këtë vit, SBASHK-u po vazhdon traditën e organizimit të pushimeve për anëtarët e saj, si shenjë vlerësimi dhe respekti për përkushtimin e tyre shumëvjeçar në arsimimin dhe edukimin e brezave.
“Ky aktivitet, i cili ka filluar me grupin e parë prej 130 pushuesve, do të vazhdojë edhe me dy grupe të tjera që do të nisen më 22 dhe 29 qershor. Në total, këtë vit do të përfshihen 437 anëtarë të sindikatës.
Sikurse çdo vit, edhe këtë herë SBASHK ka përfshirë në këtë aktivitet anëtarë nga mbarë vendi, përfshirë edhe katër bashkëkombës nga Bujanoci. Pushimi do të zgjasë pesë ditë”, thuhet në njoftim.
Përzgjedhja e pjesëmarrësve është bërë nga shoqatat sindikale në bazë të kritereve të përcaktuara nga Këshilli Drejtues i SBASHK-ut.
Kryetari i SBASHK-ut, Rrahman Jasharaj, thotë se është krenar që ky aktivitet po vazhdon sepse është shprehje e mirënjohjes për angazhimet e vazhdueshme e maksimale të këtyre pushuesve në shërbim të arsimit dhe kulturës.
