Vajza e një trafikanti të drogës, të dënuar me shtatë vite burgim nga gjyktat vendore, i kaloi të gjithë filtrat institucional për t’u përzgjedhur gjyqtare në Gjykatën Themelore në Prishtinë. Ajo është Albina Vuçetaj. Babai i saj, Rifat Vuçetaj, përveçse një i dënuar për trafikim droge, u arrestua të martën gjatë operacionit masiv të Prokurorisë Speciale.

---

Këshilli Gjyqësor i Kosovës (KGjK) nuk e ka parë problem përzgjedhjen e Albina Vuçetajt gjyqtare në Gjykatën Themelore në Prishtinë, edhe pse babai i saj Rifat Vuçetaj ishte i dënuar për trafikim të narkotikëve.

Problem nuk e ka pasur as presidentja Vjosa Osmani, e cila vitin e kaluar e dekretoi Albina Vuçetajn për gjyqtare.

Dekretimi i Albina Vuçetajt, vajzës së Rifat Vuçetajt, për gjyqtare u nënshkrua nga presidentja më 26 gusht, 2024, tregon një dokument i dekretit të cilin e ka siguruar KFVA.

Osmani që e dekretoi për gjyqtare Vuçetajn, babai i së cilës ka rekord kriminal në Kosovë, disa vite më parë hezitoi të dekretonte për Kryeprokuror të Shtetit të propozuarin e Këshillit Prokurorial të Kosovës, Blerim Isufajn, duke u thirur në “mbrojtje të integritetit dhe mbrojtje të Kushtetutës”.

Si shkak i atij procesi, Isufaj sot qëndron në krye të Prokurorisë Speciale, e cila udhëhoqi të martën mega-operacionin e bastisjeve që çuan në arrestimin e 22 personave, përfshirë Rifat Vuçetajn.

Vuçetaj dhe 21 të tjerët u arrestuan për përfshirje në një rrjet kriminal të trafikimit ndërkombëtar të narkotikëve.

Hetimet për shkatërrimin e këtij grupi kriminal filluan rreth dy vite më parë kur autoritetet kosovare pranuan nëpërmjet EUROPOL-it provat e para për rrjetin e trafikantëve nga autoritetet franceze dhe belge, raporton KFVA.

Provat kyçe përbëjnë komunikimet në platformat e koduara të komunkimeve SkyEcc dhe EncroChat, të cilat u thyen nga agjencitë evropiane dhe iu dërguan autoriteteve kosovare.

Nisja e hetimeve preliminare për rrjetin kriminal të trafikimit të narkotikëve koincidon me periudhën kur procesi për emërimin e gjyqtarëve të gjeneratës së XXII-të po zhvillohej në Këshillin Gjyqësor të Kosovës.

As hetimet preliminare për grupin, e as dënimi i Rifat Vuçetajt nga gjykatat vendore në të kaluarën për trafikim të narkotikëve, nuk e ndaluan Këshillin Gjyqësor të përzgjedhte vajzën e tij, Albinën, për gjyqtare në Gjykatën Themelore në Prishtinë.

Rifat Vuçetaj, bashkë me vëllain e tij, ishin dënuar disa vite më parë për trafikim të kokainës. Të dy ishin dënuar me vendim të formës së prerë me nga shtatë vite burgim. Rifat Vuçetaj i mbajti pesë vite në vuajtje të dënimit.

Gazeta, ka pyetur Këshillin Gjyqësor të Kosovës të enjten nëse ka qenë në dijeni për rekordin kriminal të Vuçetajt në kohën e përzgjedhjes së vajzës së tij, Albinës, për gjyqtare në Gjykatën Themelore në Prishtinë.

Deri në momentin e publikimit të këtij artikulli, KGjK-ja nuk e ka komentuar procesin e emërimit të Vuçetajt për gjyqtare.