Bisedimet e fundit për paqe mes Rusisë dhe Ukrainës, të mbajtura në Stamboll, dështuan të sjellin ndonjë përparim domethënës, duke lënë dy vendet në pozicione të pandryshuara dhe të thellësisht të kundërta. Edhe pse u ra dakord për shkëmbimin e mëtejshëm të të burgosurve, thelbi i konfliktit mbeti i paprekur, me Rusinë që paraqiti kushte të ashpra që Kievi i ka hedhur poshtë në mënyrë të përsëritur.

Sipas burimeve diplomatike, Rusia i dorëzoi delegacionit ukrainas një memorandum të ri, me kërkesa maksimaliste që praktikisht përbëjnë një thirrje për dorëzim nga ana e Ukrainës, shkruan CNN përcjell KFVA.

Mes të tjerash, Moska kërkon që Ukraina të tërhiqet nga katër rajone të cilat Rusia i ka aneksuar pjesërisht, por ende nuk i kontrollon plotësisht – një kërkesë që Ukraina e ka refuzuar kategorikisht.

Kushtet e tjera përfshijnë çarmatim të plotë të Ukrainës, ndalim të përhershëm për anëtarësim në ndonjë aleancë ushtarake, ndalim të pranisë së trupave të huaja dhe zotimit që nuk do të posedojë armë bërthamore. Po ashtu, Rusia kërkon rivendosjen e marrëdhënieve të plota diplomatike dhe ekonomike pa kërkesa për dëmshpërblime nga asnjëra palë, si dhe heqjen e të gjitha sanksioneve perëndimore ndaj saj.

Këto kërkesa konsiderohen të papranueshme jo vetëm për Kievin, por edhe për një pjesë të madhe të Evropës, që e shohin Ukrainën si një mburojë kundër ekspansionizmit rus.

Pavarësisht këtyre qëndrimeve të ngurta, Rusia përballet me dy zhvillime që mund të ndryshojnë dinamikën e konfliktit.

Së pari, Ukraina ka dëshmuar kapacitete teknologjike për të goditur objektiva thellë brenda territorit rus, siç treguan sulmet e fundit me dron ndaj bazave ajrore strategjike të Rusisë, qindra kilometra larg vijës së frontit.

Së dyti, Presidenti amerikan Donald Trump, i cili e ka vendosur përfundimin e shpejtë të luftës në Ukrainë si një nga shtyllat kryesore të mandatit të tij të dytë, po përballet me frustrime në rritje. Pas një vale sulmesh të mëdha ruse ndaj Ukrainës javën e kaluar, Trump reagoi me zemërim ndaj presidentit Putin, duke deklaruar se ai kishte “shkuar plotësisht i ÇMENDUR”.

Tani, Trump gjendet nën presion për të reaguar – ndoshta përmes rritjes së ndihmës ushtarake për Ukrainën apo vendosjes së sanksioneve të reja, të cilat kanë mbështetje të gjerë dypartiake në Senatin amerikan. Senatori Richard Blumenthal, një nga mbështetësit kryesorë të një projektligji që synon masa “shkatërruese” ndaj Moskës, e akuzoi Rusinë për “tallje me përpjekjet për paqe” dhe paralajmëroi se Kremlini po i “trajton Trumpin dhe Amerikën si budallenj”.

Ende mbetet e paqartë se si do të veprojë Trump, por e sigurt është se fati i luftës në Ukrainë dhe përfundimi i saj tani lidhet ngushtë me vendimet që do të merren në Shtëpinë e Bardhë. Ndërkohë që Putin përforcon qëndrimet e tij të papajtueshme, Trump mund të mos ketë më luksin të qëndrojë pasiv.