SHBA-të dhe Kina kanë rënë dakord për një marrëveshje për të ndihmuar në zgjidhjen e luftës tregtare që po zhvillohet midis dy ekonomive më të mëdha në botë.

Kështu së paku raportojnë media të huaja, duke u thirrur në zyrtarë të lartë të administratës së Donald Trump, përcjell Telegrafi.

Detajet e marrëveshjes, të arritur gjatë negociatave në Zvicër gjatë fundjavës, nuk u zbuluan, por zyrtarët paralajmëruan se më shumë informacion do të ndahet të hënën.

“SHBA-të kanë një deficit tregtar masiv prej 1.2 trilion dollarësh, kështu që Presidenti shpalli një emergjencë kombëtare”, tha të dielën përfaqësuesi i Tregtisë i SHBA-së, Jamieson Greer.

“Jemi të bindur se marrëveshja që arritëm me partnerët tanë kinezë do të na ndihmojë të punojmë drejt zgjidhjes së kësaj emergjence kombëtare”, ka shtuar ai.

Presidenti Trump ka vendosur tarifa deri në 145% për mallrat nga Kina, me Kinën që vendosi tarifa hakmarrëse për eksportet amerikane.

Greer iu bashkua Sekretarit të Thesarit Scott Bessent dhe Zëvendëskryeministrit Kinez He Lifeng për bisedimet në Gjenevë, Zvicër, gjatë fundjavës për të adresuar tarifën treshifrore.

“Mund t’ju them se bisedimet ishin produktive”, paralajmëroi Bessent.

Takimi ishte ndërveprimi i parë ballë për ballë midis Bessent, Greer dhe He që kur dy ekonomitë më të mëdha në botë vendosën tarifa shumë mbi 100% për mallrat e njëra-tjetrës.

Edhe pse Bessent ka thënë se tarifat dypalëshe ishin shumë të larta dhe duhej të uleshin në një masë për të zbutur tensionet, ai nuk ofroi asnjë detaj mbi uljet e dakordësuara dhe nuk pranoi pyetje nga gazetarët.

Më parë, këshilltari ekonomik i Shtëpisë së Bardhë, Kevin Hassett, tha se kinezët ishin “shumë, shumë të etur” për t’u angazhuar në diskutime dhe për të ribalancuar marrëdhëniet tregtare me Shtetet e Bashkuara.

Hassett i tha gjithashtu Fox News se më shumë marrëveshje tregtare të jashtme mund të vijnë me vende të tjera që nga kjo javë.