kfvanews
Presidentja Vjosa Osmani ka përkujtuar 23-vjetorin e Masakrës në Shtuticë, Vërbovc dhe fshatrat përreth të Drenasit.
“Në Shtuticë, Verboc e fshatrat përreth, regjimi gjenocidal i Serbisë ekzekutoi barbarisht 275 shqiptarë: fëmijë të pafajshëm, pleq, gra e burra vetëm pse ishin shqiptarë dhe e donin lirinë”, ka shkruar Osmani.
Postimi i plotë:
26-vjet më parë, toka e Drenicës u mbulua nga një dhimbje që nuk shuhet kurrë.
Në Shtuticë, Verboc e fshatrat përreth, regjimi gjenocidal i Serbisë ekzekutoi barbarisht 275 shqiptarë: fëmijë të pafajshëm, pleq, gra e burra vetëm pse ishin shqiptarë dhe e donin lirinë.
Kjo masakër, një ndër më të tmerrshmet e luftës, mbetet një plagë e hapur në ndërgjegjen e njerëzimit dhe një akt që thërret për drejtësi. Ky krim makabër ishte një përpjekje për ta shfarosur popullsinë e kësaj ane.
Por atë ditë, kur krimi monstruoz mori jetën e shumë shqiptarëve, dritën e lirisë e mbajtën gjallë luftëtarët e UÇK-së, të prirë nga heroiku Ilaz Kodra. Ata nuk u tërhoqën, ata nuk u dorëzuan. U bënë mburojë për popullin, ndaj 40 prej tyre me gjakun e tyre përjetësuan lirinë tonë.
Sot, ne nuk i përkujtojmë vetëm martirët e kësaj masakre, por nderojmë qëndresën, sakrificën dhe dinjitetin e atyre që ranë për ta fituar lirinë tonë të sotme.
Qoftë e përjetshme lavdia për dëshmorët e UÇK-së dhe kujtimi për martirët e Shtuticës, Verbocit, Drenicës dhe gjithë Kosovës!
