kfvanews
Luftëtarët britanikë Typhoon me bazë në Poloni dhe F-16 portugez nga Estonia janë angazhuar për herë të parë në përgjigje të sjelljes jonormale të një aeroplani rus.
Sipas mediave të huaja, përcjell Telegrafi, aeroplanët luftarakë iu përgjigjën një “aeroplani rus që nuk respekton normat ndërkombëtare të sigurisë” pak para orës 08:00 të së mërkurës, postoi Komanda Ajrore Aleate në X.
“Kjo është hera e parë për detashmentet e reja të Policisë Ajrore, të cilët po ruajnë integritetin e hapësirës ajrore të NATO-s 24/7/365”, thuhet në postim.
Siç thuhet më tej, Typhoon-ët britanikë, me bazë në Malbork, një qytet në Poloninë veriore, dhe F-16 portugez nga Ämari në Estoninë veriperëndimore, janë aeroplanët më të fundit që marrin pjesë në operacionin e policisë ajrore të NATO-s që mbulon hapësirën ajrore të shteteve baltike.
“Aeroplanët luftarakë britanikë me bazë në Malbork u ngritën për të vëzhguar aeroplanin. Ai iu afrua hapësirës ajrores polake…”, citohet të ketë thënë zëvendëskryeministri dhe ministri i Mbrojtjes Kombëtare, Wladław Kosiniak-Kamysz në Kraków.
Ndërkohë kujtojnë mediat, parlamenti suedez miratoi kohët e fundit vendosjen e deri në tetë aeroplanëve luftarakë Gripen në Poloni.
Kjo është në kuadrin e operacioneve të mbrojtjes ajrore të NATO-s që synojnë të garantojnë sigurinë dhe mbështetjen ushtarake dhe civile për Ukrainën.
Forcat e Armatosura Suedeze do të jenë të disponueshme për operacionet e mbrojtjes ajrore të NATO-s në Poloni nga 1 maji deri më 31 gusht. Është vlerësuar se forcat e armatosura do të përbëhen nga maksimumi 150 persona.
