Ministria e Shëndetësisë në Maqedoninë e Veriut ka njoftuar sot për ndarjen nga jeta të Stojançe Stefanov nga Koçani, i lindur në vitin 2001, i cili ishte në gjendje kritike që nga dita e parë pas plagëve të marra në ngjarjen tragjike që tronditi Koçanin muajin e kaluar, kështu duke u rritur numri i viktimave në 62, shkruan Gazeta KFVA.

Sipas të dhënave nga Akademia Ushtarake Mjekësore në Beograd, Stefanov ndërroi jetë paradite, pasi ishte intubuar dhe kishte kaluar në gjendje të rëndë që nga momenti i pranimit në këtë institucion shëndetësor.

“Pacienti kishte djegie që përfshinin 27 për qind të trupit dhe lëndime serioze nga thithja e tymit. Në VMA është operuar më 4 prill dhe është vendosur në aparat ECMO, i cili oksigjenon gjakun përmes një makinerie për shkak të thithjes së tymit. Por, për shkak të seriozitetit të plagëve, gjatë shumicës së qëndrimit në spital ka qenë në gjendje të paqëndrueshme dhe me gjendje të rëndë të përgjithshme”, thuhet në njoftimin e Ministrisë.

Në këtë tragjedi, humbën jetën 61 persona të tjerë, ndërsa rreth 196 të tjerë u lënduan.

Viktimat ishin të moshës nga 14 deri në 25 vjeç dhe vinin nga qytetet e Shkupit, Shtipit, Koçanit dhe Probishtipit. Zjarri shpërtheu gjatë një koncerti të grupit muzikor DNK, kur përdorimi i mjeteve piroteknike shkaktoi zjarrin që përfshiu shpejt të gjithë objektin.