Presidentja e Kosovës, Vjosa Osmani, ka ndarë detaje nga pjesëmarrja e saj në Forumin Diplomatik të mbajtur në Antalya, ku zhvilloi një sërë takimesh me përfaqësues të lartë ndërkombëtarë.

Përveç takimeve me homologë të saj, Osmani u takua edhe me ministrat e Jashtëm të disa shteteve afrikane dhe aziatike, ku fokusi kryesor ishte zgjerimi i bashkëpunimit në fusha me rëndësi strategjike për vendin.

Në bisedimet me zyrtarët e lartë nga Sudani, Kenia, Jordania, Tanzania, Çadi dhe Nigeri, u theksua rëndësia e forcimit të marrëdhënieve dypalëshe dhe krijimit të mundësive të reja për bashkëpunim në interes të përbashkët, bëhet e ditur nga Presidenca.

”Në kuadër të Forumit Diplomatik në Antalya, përpos takimeve me homologë, zhvillova takime të ndara edhe me ministrat e Jashtëm të: Sudanit, z. Ali Yousif Ahmed Al-Sharif, Kenias, z. Musalia Mudavadi, Jordanisë, z. Ayman Safadi, të Tanzanisë, z. Mahmoud Thabit Kombo, të Çadit, z. Abdoulaye Sabre Fadoul Cadi dhe të Nigerit, z. Bakary Yaou Sangaré.

Të gjitha këto takime ishin të përqendruara në diskutimin e potencialit për thellim të bashkëpunimit në dobi të shteteve dhe qytetarëve tanë. Në veçanti, u diskutua hapja e kapitujve të rinj të bashkëpunimit në fusha strategjike, si dhe rëndësia e përdorimit të diplomacisë në shërbim të ndërtimit të raporteve të mirëfillta e alencave të reja.

Kosova mbetet e përkushtuar ndaj një politike të jashtme aktive në shërbim të qytetarëve tanë”.