kfvanews
Presidenti i Francës, Emmanuel Macron, është shprehur lidhur me vendimin amerikan për tarifat doganore dhe ka deklaruar se pezullimi i përkohshëm i hyrjes në fuqi të këtij vendimi nuk do të sjellë stabilitet në treg.
Në një deklaratë në rrjetin social X, Macron tha se pauza e përkohshme prej 90 ditësh për vendosjen e këtyre tarifave është një sinjal për negociata. Megjithatë, sipas Macron, pauza nuk i zgjidh problemet.
“Tarifat prej 25 për qind për çelikun, aluminin dhe veturat, si dhe tarifat prej 10 për qind për të gjitha produktet e tjera, vazhdojnë të ekzistojnë. Ato përfaqësojnë 52 miliardë euro të ardhura për Bashkimin Evropian. Kjo pauzë do të thotë 90 ditë pasiguri për të gjitha bizneset tona, në të dy anët e Atlantikut”, tha Macron.
Ai theksoi gjithashtu se qëllimi i Evropës mbetet i pandryshuar “ne do të negociojmë për heqjen e këtyre tarifave të padrejta dhe do të arrijmë një marrëveshje të balancuar, pa asimetri. Së bashku me Komisionin Evropian, duhet të jemi të fortë. Evropa duhet të vazhdojë të punojë për të gjitha kundërmasat e nevojshme dhe të aktivizojë të gjitha mjetet në dispozicion për t’u mbrojtur, si dhe për të parandaluar që rrjedhat nga vendet e treta të shqetësojnë tregun tonë”.
Në fund, Macron deklaroi se Franca, bashkë me të gjithë evropianët, është e gatshme të bëjë gjithçka për të mbrojtur ndërmarrjet dhe të gjithë sektorët ekonomikë evropianë.
“Franca është gati. Duhet të jetë edhe Evropa. Të qëndrojmë me mendje të kthjellët, të bashkuar dhe të mbrojmë me vendosmëri interesat tona. Kemi të drejtë të luftojmë. Janë në rrezik vendet e punës dhe jeta e komuniteteve tona”, përfundoi presidenti francez.
Ndryshe, presidenti amerikan, Donald Trump vendosi të pauzojë tarifat doganore që i kishte vendosur javë më parë për disa vende, pos Kinës, Meksikës dhe Kanadasë.
