kfvanews
Agustin Escobar, president dhe CEO i Siemens Spanjë, ka humbur jetën në një aksident tragjik me helikopter, së bashku me bashkëshorten e tij, Merce Camrubi Modal, dhe tre fëmijët e tyre të mitur – të moshave 4, 5 dhe 11 vjeç.
Ngjarja e rëndë ndodhi mbrëmjen e së enjtes, kur helikopteri me të cilin po udhëtonin u rrëzua në lumin Hudson, në New York, shkruan cnn.
Vetëm pak çaste para nisjes, Escobar ishte fotografuar duke buzëqeshur pranë familjes së tij, në ato që do të rezultonin të ishin momentet e fundit të jetës së tyre. Në një tjetër fotografi, të gjithë shihen brenda helikopterit Bell 206L-4 LongRanger IV, pak minuta para nisjes së fluturimit fatkeq.
Sipas raportimeve fillestare, helikopteri u rrëzua vetëm 17 minuta pas ngritjes, si pasojë e një defekti teknik – humbjes së helikës së bishtit – çka çoi në një rënie të pakontrolluar në ujërat e lumit Hudson. Pamjet filmike të publikuara tregojnë momentin dramatik të aksidentit.
Familja Escobar kishte arritur në New York më herët atë ditë, për një udhëtim pushimi.
Agustin Escobar kishte marrë drejtimin e Siemens Spanjë në fund të vitit 2022. Me mbi 25 vite përvojë në pozicione drejtuese në SHBA, Amerikën Latine, Spanjë dhe Gjermani, ai konsiderohej një figurë e respektuar dhe me ndikim në botën e biznesit ndërkombëtar.
