kfvanews
Tarifat e reja të presidentit amerikan, Donald Trump, ndaj dhjetëra vendeve, përfshirë ato 104% për mallrat kineze, kanë hyrë në fuqi, duke intensifikuar luftën tregtare globale.
Ky raund i tarifave “reciproke” vjen pas vendosjes së taksave ndëshkuese nga Trump, të cilat kanë tronditur një rend tregtar global që ka ekzistuar për dekada. Kjo ka ngjallur frikën e një recesioni të mundshëm dhe ka shkaktuar një rënie të mprehtë të stoqeve në mbarë botën, raporton The Guardian.
Presidenti Trump ka dyfishuar tarifat për importet kineze, që ishin vendosur në 54% javën e kaluar, si kundërpërgjigje ndaj tarifave të shpallura nga Pekini.
Kina është shprehur se do të “luftojë deri në fund” për të mbrojtur interesat e saj, duke e parë këtë si një shantazh ekonomik. Ndërkohë, Trump ka dërguar mesazhe të përziera për investitorët, duke i përshkruar tarifat si “të përhershme”, por duke u mburrur gjithashtu se ato po shtyjnë liderët globalë të kërkojnë bisedime.
Ai theksoi se shumë shtete janë në kërkim të marrëveshjeve me SHBA-në, ndërsa ka shprehur pritshmërinë që edhe Kina do të pranojë një marrëveshje në të ardhmen.
