Cristiano Ronaldo ka zyrtarizuar hapin e tij në botën e arteve marciale të përziera, duke u bërë aksionar i Way of Warrior FC (WOW FC), organizata spanjolle e MMA-së ku është aktiv edhe kampioni i UFC-së, Ilia Topuria.
Ylli 40-vjeçar e përshkroi MMA-në si një sport që mishëron “disiplinë, respekt, rezistencë dhe kërkim të përsosmërisë”. Ronaldo shprehu krenarinë për këtë partneritet, i cili synon të çojë MMA-në në një nivel të ri dhe të frymëzojë brezin e ri të sportistëve.
Edhe Topuria e konsideroi bashkimin e CR7 me WOW FC si një moment historik për sportin.
Ky hap vjen në një kohë kur portugezi ka folur hapur për afrimin e pensionimit, duke pranuar se “dita po vjen së shpejti”, por se është i përgatitur për të.
WOW FC, me qendër në Madrid, vazhdon zgjerimin global, teksa eventet e radhës janë planifikuar më 28 nëntor (WOW 24) dhe 23 dhjetor (WOW 25). Ndërkohë, Ronaldo vazhdon të zgjerojë portofolin e tij të bizneseve, që përfshin hotele, palestra dhe markën globale CR7.