Presidenti i SHBA-së, Donald Trump, priti kryetarin e zgjedhur të bashkisë së Nju Jorkut, Zohran Mamdani, në një takim në Shtëpinë e Bardhë, të cilin të dy e përshkruan si produktiv. Takimi përfaqëson një kthesë dramatike nga retorika e mëparshme e Trump, gjatë së cilës ai e quajti Mamdani-n socialist demokrat, të çmendur dhe komunist, dhe e kritikoi ashpër atë.
Toni miqësor midis dy politikanëve i habiti shumë njerëz, duke pasur parasysh se Trump e kishte sulmuar ashpër Mamdanin për muaj të tërë dhe madje i kishte nxitur votuesit të mbështesnin kundërshtarin e tij, ish-guvernatorin Andrew Cuomo. Kur u pyet për sulmet e mëparshme, Trump i minimizoi ato, duke sugjeruar se Mamdani mund t’u bënte përshtypje konservatorëve.
Nga ana tjetër, kur Mamdani u pyet për kritikat e tij ndaj Trump, të cilin e quajti “despot”, kryebashkiaku i sapozgjedhur theksoi se, pavarësisht dallimeve ideologjike, ata kishin gjetur gjuhë të përbashkët për çështjen e uljes së kostos së jetesës, transmeton Klankosova.tv
Trump tha me shaka, “Më kanë quajtur shumë më keq se despot”.
Gjatë konferencës për shtyp që zgjati gjysmë ore, gazetarët u përpoqën vazhdimisht të provokonin një përballje midis dy udhëheqësve.
Kur një gazetar e pyeti Mamdanin nëse ai ende e konsideronte Trumpin fashist, presidenti e ndërpreu, i përkëdheli dorën dhe me shaka tha se mund të “thjesht thoshte po”.
“Është më e lehtë sesa të shpjegosh”, shtoi Trump.
Mamdani tha: “Në rregull, po”.