Ukraina ka hedhur një hap të ri drejt modernizimit të forcave ajrore, duke nënshkruar në Paris një marrëveshje të cilësuar si moment historik në bashkëpunimin ushtarak me Francën, shkruan Gazeta KFVA.
Presidenti Volodymyr Zelensky, i cili zbarkoi në bazën ajrore “Villacoublay” nën masa të rrepta sigurie, firmosi së bashku me Emmanuel Macron një letër qëllimi që i hap rrugë blerjes së deri në 100 avionëve “Rafale”, bashkë me një arsenal mbështetës të teknologjive moderne.
Në pistën e bazës ajrore, mes avionëve të rreshtuar dhe një atmosfere që ngjante me një demonstrim fuqie, dy liderët u pozicionuan pranë një “Rafale” të armatosur plotësisht — një simbol i qartë i asaj që Franca synon t’i ofrojë Ukrainës: kapacitete të nivelit të parë për t’iu kundërvënë Rusisë.
Paketa, e cila po përshkruhet si një prej më të gjërave të ofruara ndonjëherë nga Parisi për një vend në luftë, pritet të përfshijë dronë, sisteme të avancuara mbrojtjeje ajrore, armatime precize dhe pajisje radarike. SAMP/T dhe radari GF-300, të ekspozuar në ceremoni, shërbyen si dëshmi se ajo që Franca ka dërguar deri sot është vetëm fillimi.
Vizita e Zelensky-t, e nënta në Paris që nga viti 2022, nënvizoi edhe një herë rolin e rritur të Francës në aleancën perëndimore, në një kohë kur ndihma amerikane ka hyrë në fazë pasigurie. Macron, i vendosur dhe serioz gjatë takimit, e cilësoi bashkëpunimin me Ukrainën si “strategjik, afatgjatë dhe të pazëvendësueshëm”.
“Rafale”, një avion që ndërthur fuqinë me fleksibilitetin, shihet si një aset që mund ta ndryshojë lojën në qiellin e Ukrainës. Me aftësinë për të kryer bombardime të thella, përleshje ajrore dhe sulme precize brenda të njëjtit mision, ai përbën një tjetër shtyllë në transformimin e forcave ajrore të Kievit — një transformim që tani mbështetet edhe nga një prej fuqive kryesore evropiane./Kfvagency.com