Zyra e Prokurorit të Përgjithshëm të Stambollit ka lëshuar sot më 7 nëntor, urdhërarreste për 37 të dyshuar, përfshirë kryeministrin izraelit Benjamin Netanyahu, me akuza për kryerjen e gjenocidit.
Urdhërarrestet u lëshuan si pjesë e një hetimi mbi krimet e pretenduara të luftës dhe mizoritë e kryera gjatë sulmeve të Izraelit në Gaza.
Të dyshuarit thuhet se përfshijnë figura të larta politike dhe ushtarake izraelite, të akuzuar për drejtimin ose lehtësimin e sulmeve, që rezultuan në vdekjen e mbi 68,000 palestinezëve, kryesisht grave dhe fëmijëve.
Pas dorëzimit të një padie penale në Zyrën e Prokurorit të Përgjithshëm, Kryetari i Bashkësisë së Avokatëve të Stambollit, Yasin Samli, mbajti një konferencë për shtyp jashtë Gjykatës së Stambollit, duke dënuar Izraelin për kryerjen e gjenocidit, krimeve kundër njerëzimit dhe krimeve të luftës në Gaza, pavarësisht nënshkrimit të një marrëveshjeje për armëpushim.
Samli tha se veprimet e Izraelit nuk kufizohen vetëm në Gaza, duke theksuar se “struktura terroriste e Izraelit” është bërë kërcënim për gjithë njerëzimin. Ai shtoi se gjatë dy viteve të fundit, Izraeli kishte kryer sulme në Liban, Siri, Tunizi, Iran, Katar, Jemen, Irak, Maltë dhe Egjipt.
Duke kujtuar vrasjen e Hind Rajab, 5-vjeçare, e cila u qëllua 335 herë brenda një automjeti, Samli tha akti tregon se shteti izraelit po bën gjenocid hapur.
“Ky akt i tregon botës se Izraeli po kryen një gjenocid të hapur. Izraeli vret fëmijë nga frika. Izraeli është një kërcënim për gjithë njerëzimin”.
Ai shtoi se Zyra e Avokatisë kishte depozituar më parë padi pranë Gjykatës Ndërkombëtare Penale (ICC) dhe Zyrës së OKB-së për të Drejtat e Njeriut, pas së cilës ICC lëshoi urdhër-arreste për dy zyrtarë izraelitë të akuzuar për gjenocid.
“Sot, ne kemi depozituar një padi të re mbi vrasjen e Hind Rajab, bombardimin e Spitalit Turko-Palestinez të Miqësisë dhe krimet e kryera ndaj aktivistëve të Flotës Globale Sumud”, tha Samli.
Duke theksuar se Izraeli vazhdon krimet e tij pavarësisht vendimeve të OKB-së, ICC-së dhe Gjykatës Ndërkombëtare të Drejtësisë, Samli nënvizoi se sipas ligjit turk, gjenocidi, krimet kundër njerëzimit dhe krimet e luftës hyjnë në juridiksionin e gjykatave turke dhe nuk kanë afat parashkrimi.
Samli përfundoi duke thënë se kryesit e gjenocidit një ditë do të mbahen përgjegjës para ligjit, duke shtuar se Shoqata Ndërkombëtare e Avokatëve dhe Bashkësia e Avokatëve e Stambollit do të vazhdojnë të jenë zëri i ndërgjegjes së njerëzimit dhe mbrojtësit e drejtësisë.