Zëvendëshefja e stafit të Presidentes së Kosovës, Vjosa Osmani, Learta Hollaj, ka reaguar ndaj deklaratave të ish-kryeministrit Isa Mustafa, duke i cilësuar ato si “shpërthim i hidhur i një njeriu që nuk po gjen qetësi për ta pranuar fundin e tij politik”.
Në reagimin e saj, Hollaj tha se Mustafa, në vend që të reflektojë për dështimet politike, “zgjedh të sulmojë një lidere që në çdo hap ka mbrojtur demokracinë, sovranitetin dhe dinjitetin e Kosovës”.
“Në vend që të heshtë dhe të reflektojë për dështimet e veta politike, çmimin e të cilave akoma e paguan Kosova, për mënyrën se si e zhbëri besimin e qytetarëve dhe e ktheu partinë e tij në një hije të vetvetes, ai zgjedh të sulmojë një lidere që e ka mbrojtur demokracinë dhe shtetin”, tha Hollaj.
Ajo i kujtoi Mustafës se kur ai flet për “tradhti”, qytetarët kujtojnë “marrëveshjet e errëta të vitit 2014, pazaret e pushtetit dhe marrëveshjet e dëmshme me Serbinë që përmbanin shkelje kushtetuese”.
Sipas saj, Osmani, që atëkohë ishte deputete, kishte refuzuar të bëhej pjesë e atyre marrëveshjeve dhe “kjo nuk ishte tradhti, por besnikëri ndaj Kosovës dhe qytetarëve”.
“Nuk është tradhti të mos u bindesh verbërisht liderëve si Mustafa që devijojnë nga parimet dhe shkelin interesat e Kosovës. Është akt guximi. Është thelbi i demokracisë që Presidentja Osmani e mbron me konsistencë”, shtoi Hollaj.
Në fund të reagimit, ajo theksoi se “koha e burrave që mendojnë se populli u detyrohet atyre ka perënduar”, duke shtuar se sot flasin “veprat, besimi qytetar dhe vlerat që përfaqëson Presidentja e vendit”.