Arbër Emini, kandidat i pavarur për kryetar të Kllokotit, ka thënë se vendimi i parë i PZAP-së ka qenë i ngutshëm në lidhje me dyshimet e tij për parregullsi në procesin e votimit më 12 tetor në këtë komunë.

Në Edicionin Special në Klan Kosova, ai tha se strukturat ilegale të Serbisë që funksionojnë në Komunën e Kllokotit, në koordinim me Listën Serbe, kanë lëshuar vërtetime mjekësore të Serbisë për të kryer votimet me asistencë të strukturave të Listës Serbe.

“Kjo ka qenë alarmuese edhe për komisionerët, edhe për vëzhguesit, sepse ka qenë një numër i madh. Janë lajmëruar organet ligjzbatuese, janë bërë arrestime, dhe kjo ka qenë një ndërhyrje direkte në procesin zgjedhor”, tha Emini.

Ai tha se janë rreth 200 vërtetime mjekësore të lëshuara ilegalisht nga Serbia, teksa theksoi se mbi 100 persona me këto vërtetime veçse kanë votuar.

“Mbi 180 vërtetime mjekësore ilegale të Serbisë janë lëshuar për atë ditë, ndërsa mbi 100 të tillë kanë votuar atë ditë. Personi që ka lëshuar vërtetimet mjekësore nga strukturat ilegale serbe, është arrestuar. Ka qenë organizim i Listës Serbe, ka qenë urdhër i Beogradit që votimi të kryhet paradite. Besoj që dikush i ka mbushur ato fletëvotime”, tha ai.