Ali Larijani, një nga figurat më të fuqishme të Iranit dhe një njeri i besueshëm i udhëheqësit të ndjerë suprem, Ajatollah Ali Khamenei, u vra në një sulm ajror në kryeqytetin Teheran, më 17 mars.
Në postin e fuqishëm të sekretarit të Këshillit Suprem të Sigurisë Kombëtare të Iranit – organit kyç të politikëbërjes në këtë vend – Larijani ishte udhëheqës de facto i Republikës Islamike, pas vrasjes së Khameneit në një sulm izraelit, më 28 shkurt.
Edhe pse nuk ishte klerik, ai ishte një figurë unifikuese, duke bashkuar fraksione politike dhe duke mbajtur lidhje të forta me Korpusin e Gardës Revolucionare Islamike (IRGC), shërbimet e inteligjencës dhe establishmentin klerikal.
Me vdekejn e Khameneit, me djalin e tij si pasardhës të kontestuar dhe tani me Larijanin e vdekur, Irani përballet me atë që shihet si një boshllëk lidershipi.
Vdekja e tij, thonë ekspertët, mund t’i ndërlikojë edhe përpjekjet diplomatike për t’i dhënë fund luftës aktuale.
“Midis atyre që njohim se janë ende brenda sistemit të Republikës Islamike – pra politikanët që mund të konfirmojmë se janë ende [gjallë] – nuk ka zëvendësim për Ali Larijanin në këtë rol”, thotë Babak Dorbeiki, analist politik me seli në Britani.
Operatori i sistemit
Gjatë karrierës së tij politike që zgjati me dekada, Larijani, 67-vjeç, shërbeu mes tjerash si negociator për çështje bërthamore dhe kryetar parlamenti.
Por, mbi të gjitha, ishte një i mbijetuar politik.
Ai humbi dy herë mbështetjen e establishmentit, por arriti të rikthehej në skenë.
Pas luftës 12-ditore të Iranit me Izraelin dhe Shtetet e Bashkuara në qershor të vitit 2025, roli i tij u forcua, duke marrë përgjegjësi më të mëdha në fushën e sigurisë kombëtare.
Ai shërbeu edhe në IRGC, drejtoi transmetuesin shtetëror për një dekadë dhe ndihmoi në miratimin në Parlament të marrëveshjes bërthamore të vitit 2015 me fuqitë botërore.
Për Republikën Islamike, Larijani funksionoi si një urë lidhëse midis klerikëve dhe gjeneralëve, por edhe midis Teheranit dhe kryeqyteteve perëndimore jashtë vendit.
Ai nuk ishte një figurë ideologjike radikale. Por, konsiderohej si një nga operatorët më të aftë të sistemit.
Përkundër kësaj, sistemi e refuzoi dy herë.
Në vitin 2021 dhe përsëri në vitin 2024, Larijani u ndalua të kandidonte për president nga ana e Këshillit të Gardianëve – një organ klerikal i dominuar nga përfaqësues të vijës së ashpër.
Vendimet i tronditën edhe kritikët e tij.
