Austria u zgjua këtë mëngjes me një shtresë të trashë bore që shkaktoi një kolaps të plotë të trafikut. Në Vjenë ra 20 centimetra borë gjatë natës dhe të gjitha shërbimet e qytetit janë në gatishmëri të plotë për shkak të një numri të madh ndërhyrjesh.
Situata më e vështirë paraqitet në aeroporte, ku trafiku është bllokuar plotësisht. “Për shkak të stuhisë së vazhdueshme të borës, ndalimi i punës është zgjatur në 12 orë”, konfirmoi aeroporti, me shpresën se fluturimet e para do të nisen pas mesditës, raporton Kronen Zeitung.
Stuhia e borës goditi më rëndë autostradat në pjesët lindore dhe jugore të vendit, ku qindra kamionë mbetën të bllokuar në rrugë, dhe në Tirol një ortek mbuloi një autobus me 11 pasagjerë.
Për fat të mirë, askush në autobus nuk u lëndua. Për shkak të kushteve ekstreme, policia u detyrua të mbyllte Unazën e Vjenës gjatë natës në të dy drejtimet në të gjithë seksionin dhe pastrimi është ende duke vazhduar.
Një kamion i ngarkuar me mallra u përmbys në autostradën A1 pranë St. Pölten, duke shkaktuar një bllokim tjetër trafiku për disa orë. Më shumë se 30 ambulanca u thirrën në aksident në të gjithë vendin dhe dy persona u lënduan rëndë.
Më shumë se 4,000 familje janë pa energji elektrike. /Reporteri.net/
