Viti 2025, ka qenë një prej më të suksesshmëve për Aeroportin Ndërkombëtar të Prishtinës “Adem Jashari”. Përgjatë vitit të kaluar, ky aeroport priti e përcolli mbi gjysmëmilioni pasagjerë brenda një muaji, duke shënuar kështu rekord historik. Ndërkohë, numri total i udhëtarëve shkoi në 4.6 milionë, shkruan KFVAgency.com
Mbi 4.6 milionë udhëtarë ka regjistruar Aeroporti “Adem Jashari” në vitin që lamë pas, duke shënuar një rritje prej 12% krahasuar me vitin 2024.
Rrjedhimisht, rritje ka pasur edhe në numrin e fluturimeve që ka arritur në gati 30 mijë. Nga 27 mijë e 36 fluturime sa ishin në vitin paraprak, gjatë 2025’ës ky numër shkoi në 29 mijë e 962 fluturime.
Pothuajse secilin muaj përgjatë vitit të kaluar, Aeroporti i Prishtinës ka shënuar rritje të numrit të udhëtarëve. Ky trend e ka përcjellë aeroportin edhe në fundvit.
Numrin më të madh të udhëtarëve, ANP e regjistroi gjatë gushtit, duke shënuar rekord historik me mbi 500 udhëtarë në muaj.
Përveç rritjes së trafikut ajror, Aeroporti Ndërkombëtar i Prishtinës ka vazhduar investimet në përmirësimin e shërbimeve për pasagjerët. Tash e një vit janë funksionale pajisjet e vetë-regjistrimit (self check-in), të cilat u mundësojnë udhëtarëve që procesin e regjistrimit për fluturim ta përfundojnë brenda pak minutave.
Përmes këtyre pajisjeve, pasagjerët mund të skanojnë dokumentet e udhëtimit, të përzgjedhin opsionet e dëshiruara dhe të printojnë kartën e imbarkimit, pa pasur nevojë të presin në radhë në sportelet tradicionale.
Investimet më të reja u përuruan në fillim të nëntorit, përmes së cilave synohet të bëhet sa më e këndshme përvoja e pasagjerëve.
Aeroportit i është shtuar një parking i ri me sipërfaqe mbi 17 mijë e 200 metra katror, e që ka kapacitet për më shumë se 750 automjete.
Për të reduktuar kohën e pritjes së udhëtarëve pas mbërritjes, është shtuar një rrip i ri për bagazhe si dhe janë shtuar dyert e ndara për nisje dhe mbërritje, për më shumë efikasitet gjatë periudhave me fluks të lartë udhëtarësh.
Një dyqan i ri Unifree-Check Inn është shtuar në sallën e mbërritjeve.
Gjatë vitit të kaluar, është zgjeruar edhe harta e destinacioneve drejt të cilave realizohen fluturime, ku tashmë ka edhe fluturime direkte drejt kryeqendrave evropiane.
Parisi, Amsterdami, Kopenhaga e Stockholm, janë veç disa prej tyre.
Zvicra mbetet destinacioni kryesor nga rreth 35 sa ofrohen, pasuar nga Gjermania, Turqia e Austria.
Numri i fluturimeve që realizohen nga ky aeroport shkon deri në 100 brenda një dite.
E mërkura, shtuna dhe e diela janë ditët më të ngarkuara me fluturime dhe udhëtarë.
