kfvanews
Kryediplomati i Turqisë, Hakan Fidan, ka deklaruar se Ankaraja është kundër veprimeve ushtarake në Iran dhe se prioriteti i saj është shmangia e destabilizimit. Deklarata e tij vjen një ditë pasi Presidenti amerikan, Donald Trump, paralajmëroi “veprime shumë të forta” ndaj Iranit nëse ekzekuton protestuesit dhe raportimeve se Pentagoni ka përgatitur opsione për veprime ushtarake kundër Iranit.
“Ne jemi kundër një veprimi ushtarak kundër Iranit,” tha Fidan në një konferencë për shtyp në Stamboll, duke shtuar se Turqia do të vazhdojë nismat e saj diplomatike në lidhje me Iranin, raporton CNN, përcjell KFVA.
“Ata janë nën sanksione për shkak të disa politikave rajonale dhe ndërkombëtare që kanë ndjekur. Ne i themi Iranit: ju duhet t’i zgjidhni çështjet tuaja në rajon,” shtoi ai.
Ministri i Jashtëm turk tha se disa njerëz po i keqkuptojnë protestat që burojnë nga probleme dhe pakënaqësi të justifikuara ekonomike si një kryengritje kundër regjimit.
I pyetur për njoftimin e fundit të administratës Trump se vendet që bëjnë biznes me Iranin do të përballen me një tarifë të re prej 25%, e cila ka të ngjarë të zbatohet edhe ndaj Turqisë, Fidan tha se kjo ishte vetëm një deklaratë dhe jo një “dekret konkret presidencial”. Si rrjedhojë, ai tha se Turqia ende nuk e ka futur në agjendë shqyrtimin e tarifave të reja.
Ndryshe, Trump as sot nuk ka përjashtuar veprimet ushtarake ndaj Iranit, teksa tha se po vëzhgojnë situatën.
