kfvanews
Kryeministri në detyrë i Kosovës, Albin Kurti, deklaroi se Masakra e Reçakut ishte momenti kur, përmes ambasadorit William Walker, u bë e ditur e vërteta për krimet e luftës, krimet kundër njerëzimit dhe gjenocidin e kryer nga Serbia ndaj shqiptarëve të Kosovës.
Ai tha se pas kësaj masakre u mobilizua opinioni publik ndërkombëtar dhe diplomacia perëndimore.
Kurti theksoi se drejtësia për këtë krim ende mungon, por institucionet e Kosovës mbeten të përkushtuara për të sjellë përgjegjësit para drejtësisë. Ai nderoi 45 martirët e Reçakut dhe 11 dëshmorët e Kombit, të udhëhequr nga komandanti Ahmet Kaçiku.
“Para 27 vjetësh, këtu nga Reçaku, nëpërmjet ambasadorit William Walker, u bë e ditur e vërteta për krimet e luftës, krimet kundër njerëzimit dhe krimin e gjenocidit të Serbisë si shtet ndaj popullit shqiptar në Kosovë. Pas Masakrës së Reçakut u ndërgjegjësua, u vetëdijesua dhe u mobilizua edhe opinioni publik ndërkombëtar, si dhe kancelaritë diplomatike perëndimore. Jemi këtu bashkë, si krerë të institucioneve, me kryetarë të komunave dhe kolegë nga qeveria e parlamenti, por edhe zyrtarë të tjerë të shtetit, që të shprehim dhimbjen tonë për këtë plagë të hapur, së cilës ende i mungon drejtësia, por njëkohësisht edhe përkushtimin tonë që gjithmonë do të jemi të angazhuar për t’i sjellë kriminelët para gjyqit dhe për t’i ndëshkuar ata për mizoritë e para 27 vjetëve. Lavdi 45 martirëve të Reçakut dhe 11 dëshmorëve të Kombit, të udhëhequr nga komandanti Ahmet Kaçiku”, deklaroi Kurti.
