Sindikata e Policisë së Kosovës ka njoftuar se nuk është kryer pagesa e dhjetorit për familjet e policëve të rënë gjatë detyrës, duke shprehur shqetësim për këtë.
Në njoftim thuhet se Drejtoria e Financave ka bërë kërkesën për ndarjen e mjeteve në vlerë prej 290 mijë euro, por se nuk janë ekzekutuar ende.
“Si pasojë, familjet e policëve të rënë në detyrë, të cilët janë një kategori e shenjtë dhe e respektuar për vendin tonë, kanë mbetur pa pagesë edhe pas përmbylljes së vitit”, theksohet në njoftim.
Sindikata e ka quajtur këtë situatë të papranueshme dhe të dhimbshme për familjet e policëve të rënë.
“Sindikata e Policisë së Kosovës u bën thirrje institucioneve përgjegjëse, në veçanti Ministrisë së Financave, që sa më parë të gjejnë zgjidhje dhe të realizojnë pagesat e mbetura, në mënyrë që të mos cenohet dinjiteti dhe mirëqenia e këtyre familjeve”, thuhet tutje.
