kfvanews
Kryeprokurori i Prokurorisë Themelore në Prizren, Petrit Kryeziu, ka njoftuar se aksioni i nisur mëngjesin e sotëm lidhur me dyshimet për keqpërdorime në Byronë Kosovare të Sigurimeve, ka përfunduar me arrestimin e 39 persona, mes tyre dy zyrtarë të BKS-së.
Kryeziu tha se target kanë qenë 46 persona dhe se 7 prej tyre ndodhen jashtë Kosovës.
“Ne kemi arritë t’i arrestojmë 39 persona, përderisa 7 prej tyre rezultojnë se janë jashtë Kosovës. Mirëpo veprimet hetimore ndaj tyre nuk do të ndalen”, tha ai.
Kryeziu bëri të ditur se në aksionin e sotëm janë sekuestruar 23 mijë e 800 euro, ari, aksesorë, orë dore, armë, pajisje elektronike.
“Deri në këtë fazë kemi siguruar 166 transaksione të dyshimta, në mesin e tyre 25 kanë të bëjnë me 12 persona me të cikët kanë arritur ujdi fiktive jashtëgjyqësore, kinse si përfaqësues të personave që më herët kanë pasur aksidente në komunikacion dhe i kanë kompensuar në vitin 2022 dhe 2023 përderisa personat tjerë veçse kanë qenë të kompensuar në vitet e mëhershme në vitin 2016 dhe 2017. Edhe 141 transaksione tjera te persona të ndryshme pa asnjë dokument të vetëm. Shuma më e vogël e transaksioneve ka qenë 6 mijë e 800 euro, ndërsa më e larta 68 mijë. Aksioni i cili ka përfshirë gjithë territorin e Republikës së Kosovës, nuk ka pasur regjion që nuk ka pasur bastisje dhe kontroll dhe arrestime në ditën e sotme. Të holla të sekuestruara në aksionin e sotëm janë 23 mijë e 800 euro, ari, aksesorë, orë dore, armë, pajisje elektronike dhe kemi arritur t’i bllokojmë të hollat prej 1 milion e 300 mijë e 886 euro.
Kemi qenë në terren 8 prokurorë, dhe kemi pasur njësite të shumta policore, rreth 400 zyrtarë policorë”, bëri të ditur ai në konferencën për media.
