kfvanews
Kompania Rajonale e Ujësjellësit “Prishtina” ka publikuar urdhëresën tarifore për vitin 2026 për rajonin e Prishtinës sa i përket tarifave të reja që kanë hyrë në fuqi nga 1 janari.
KRU “Prishtina” thotë se tarifat caktohen për “shërbimet e ujësjellësit dhe të ujërave të ndotura; furnizimin me ujë të pa-trajtuar me shumicë; ujin e trajtuar me shumicë”.
KRU “Prishtina” shton se “tarifa llogaritet duke pjesëtuar kërkesën për të ardhura me vëllimin e ujit të shitur, duke marrë parasysh efikasitetin në arkëtimin e të ardhurave. Kërkesa për të ardhura përbëhet nga tre komponentë kryesorë: shpenzimet operative, mirëmbajtja kapitale dhe kthimi në Bazën Rregullatore të Aseteve.
KRU “Prishtina” thotë se ka paraqitur kërkesa për periudhën 2026–2028, të cilat përfshijnë:
– Shpenzime operative për sigurimin e furnizimit të vazhdueshëm me ujë dhe shërbimeve të kanalizimit, duke përfshirë rritjen e kostove për personelin dhe energjinë elektrike;
– Projekte kapitale dhe mirëmbajtje të rrjetit dhe makinerive ekzistuese, për të reduktuar defektet dhe ndërprerjet në shërbim;
– Investime për modernizimin e aseteve dhe përmirësimin e cilësisë së shërbimeve për konsumatorët.
“Edhe me tarifat e aprovuara, KRU “Prishtina” mbetet e përkushtuar të ofrojë shërbime të qëndrueshme, cilësore dhe pa ndërprerje për qytetarët.”
