Ministri në detyrë i Financave, Hekuran Murati, njoftoi sot se janë ekzekutuar pagesat shtesë të njëhershme në vlerë 100 euro për fëmijët dhe pensionistët.
Kjo shtesë është edhe për kategoritë e luftës, dhe personat me aftësi të kufizuara.
“Ashtu siç kishte njoftuar Kryeministri Kurti javën që shkoi, sot kemi bërë transferimin e shtesës së njëhershme prej 100 eurove për fëmijët 0-16 vjeç, si dhe për përfituesit e pensioneve bazike, kontributive, kategoritë e luftës, aftësive të kufizuara, dhe skemave tjera sipas kritereve të përcaktuara në vendim”, tregoi Murati.
”Varësisht nga banka ku përfituesit kanë llogarinë, në orët në vijim do të pranojnë edhe mjetet e transferuara”, tha ai.
Kjo pako prej 100 eurove ishte pjesë e lojës elektorale të Albin Kurtit para zgjedhjeve të 28 dhjetorit, manovër kjo që duket se i doli mirë në fund, meqë mori rezultat të madh prej 50% të votave.
