kfvanews
Donald Trump ka shkaktuar një mosmarrëveshje të re me Danimarkën pas emërimit të një të dërguari të posaçëm për Groenlandën, ishullin Arktik që ai ka sugjeruar më parë se do të dëshironte ta aneksonte.
Trump njoftoi të dielën se Jeff Landry, guvernatori republikan i Luizianës, do të shërbejë si i dërguari special i SHBA-së për Groenlandën, një territor gjysmë-autonom i Mbretërisë së Danimarkës.
Në një postim në rrjetet sociale, presidenti amerikan tha se Landry kuptonte rëndësinë strategjike të Groenlandës për sigurinë kombëtare të SHBA-së dhe se do të promovonte interesat amerikane.
Kryeministri i Groenlandës deklaroi se ishulli duhet të vendosë vetë për të ardhmen e tij dhe se integriteti territorial duhet të respektohet.
Ky veprim ka shqetësuar Kopenhagenin, i cili do të thërrasë ambasadorin amerikan për një “shpjegim zyrtar”.
Guvernatori Landry shkroi në X se ishte një nder të shërbente në një “pozicion vullnetar për të promovuar interesat amerikane në Groenlandë”, duke shtuar se detyrat e tij si guvernator i Luizianës nuk do të ndikoheshin.
Ministri i Jashtëm i Danimarkës, Lars Løkke Rasmussen, e përshkroi emërimin si “thellësisht shqetësues” dhe paralajmëroi Uashingtonin për respektimin e sovranitetit danez. Ai tha për transmetuesin TV2:
“Për sa kohë që kemi një mbretëri të përbërë nga Danimarka, Ishujt Faroe dhe Groenlanda, nuk mund të pranojmë veprime që dëmtojnë integritetin tonë territorial.”
Kryeministri i Groenlandës, Jens-Frederik Nielsen, shtoi se territori është i gatshëm të bashkëpunojë me SHBA-në dhe vende të tjera, por vetëm me bazë respekti reciprok:
“Emërimi i një të dërguari special nuk ndryshon asgjë për ne. Ne vendosim vetë për të ardhmen tonë. Groenlanda i përket banorëve të saj dhe integriteti territorial duhet të respektohet.”
Që nga rikthimi në Shtëpinë e Bardhë në janar, Trump ka treguar interes të shtuar për Groenlandën, duke përmendur vendndodhjen strategjike dhe pasuritë minerale të ishullit. Ai nuk ka përjashtuar përdorimin e forcës për të siguruar kontrollin, një qëndrim që ka shqetësuar Danimarkën, aleate e NATO-s me marrëdhënie historikisht të ngushta me Uashingtonin.
