kfvanews
Prokuroria Speciale e Republikës së Kosovës (PSRK) ka paraqitur në Gjykatën Themelore në Prishtinë kërkesë për caktimin e masës së paraburgimit ndaj ish-ministrit të Zhvillimit Ekonomik, Fadil Ismajli dhe gjashtë personave të tjerë, të dyshuar për vepra të rënda të korrupsionit.
Sipas Prokurorisë, ekziston dyshimi i bazuar se të pandehurit M.D., J.M., F.I., B.D., Sh.T., N.K. dhe G.L., duke vepruar në bashkëkryerje dhe në vazhdimësi nga data 20 shkurt 2023 deri më 18 dhjetor 2025, kanë ndërmarrë veprime me qëllim të përfitimit të kundërligjshëm personal.
Në kërkesën e PSRK-së thuhet se i pandehuri M.D., në emër të F.I., në kundërshtim me ligjin, ka parashtruar ankesë për ndryshim të një vendimi përfundimtar për shpronësim të pronës, ndonëse afati ligjor kishte kaluar për më shumë se tetë vjet. Megjithatë, kjo rrethanë nuk është kundërshtuar nga i pandehuri J.M., as nga Qeveria e Kosovës, e përfaqësuar nga Avokatura Shtetërore, duke mundësuar që rasti të përfundojë me marrëveshje gjyqësore, sikurse edhe disa raste të tjera.
Si pasojë e këtyre veprimeve, vetëm në rastin e fundit, sipas Prokurorisë, buxhetit të shtetit i është shkaktuar dëm mbi 220 mijë euro, ndërsa dëmi i përgjithshëm ende nuk është përcaktuar, por dyshohet se arrin vlera milionëshe.
PSRK-ja dyshon se të pandehurit, në bashkëkryerje dhe në vazhdimësi, kanë kryer veprat penale: keqpërdorim i pozitës apo autoritetit zyrtar, marrje ryshfeti, dhënie ryshfeti, ushtrim i ndikimit dhe deklarim i rremë.
