kfvanews
Protestuesit kanë sulmuar selinë e dy gazetave kryesore në Bangladesh, mes trazirave të gjera pas vdekjes së një aktivisti politik.
Një turmë protestuesish i vuri zjarrin zyrave të gazetës ditore në gjuhën bengali Prothom Alo dhe gazetës ditore në anglisht Daily Star në kryeqytetin e Bangladeshit, Dhaka, duke lënë gazetarët dhe pjesën tjetër të stafit të bllokuar brenda.
Një nga gazetarët e Daily Star, Zyma Islam, shkroi në Facebook: “Nuk mund të marr më frymë. Ka shumë tym.”
Të dyja gazetat ndaluan përditësimin e edicioneve online pas sulmeve dhe nuk publikuan as versionin e tyre në print të premten.
Trupat u vendosën pranë ndërtesës së Star dhe zjarrfikësit u detyruan të shpëtonin gazetarët e bllokuar brenda. Zjarri u vu nën kontroll herët të premten.
Sharif Osman Hadi, një figurë e njohur e protestave studentore dhe politike, ndërroi jetë të enjten pas gjashtë ditësh në aparate mbështetëse të jetës, pasi u qëllua nga persona të paidentifikuar në Dhaka. Vdekja e tij ndezi protesta masive në kryeqytet, ku qindra qytetarë u mblodhën në Sheshin Shahbagh pranë Universitetit të Dhakës.
Protestuesit akuzuan gazetat për lidhje të supozuara me Indinë dhe afërsi me udhëheqësin e përkohshëm të vendit, fituesin e Çmimit Nobel për Paqe, Muhammad Yunus.
Kryengritja e vitit të kaluar, e cila nisi nga studentët kundër sistemit të kuotave në administratë, solli mbi 1 mijë e 400 viktima sipas OKB-së dhe u cilësua si revolucioni i parë i “Gjeneratës Z”. Pas dorëheqjes së ish-kryeministres Sheikh Hasina në gusht 2024, Yunus mori drejtimin e përkohshëm të vendit.
Autoritetet kanë identifikuar të dyshuarit për atentatin ndaj Hadit, duke thënë se ekzekutori ka gjasa të ketë ikur në Indi.
