kfvanews
Pas publikimit të bisedave skandaloze të kryeshefit të Ibër-Lepencit, që u bënë pjesë e asaj që tashmë po cilësohet si afera më e re e Vetëvendosjes “WhatsApp”, në mbrojtje ka dalë ministri në detyrë i Financave, Punës dhe Transfereve, Hekuran Murati, shkruan Gazeta KFVA.
Në vend që të adresojë përmbajtjen e bisedave dhe dyshimet për keqpërdorime e ndikime politike në ndërmarrjen publike, Murati ka zgjedhur një tjetër linjë mbrojtjeje, ‘statistikat financiare’.
Ai publikoi të dhëna për performancën e kompanisë së ujësjellësit “Ibër-Lepenci”, duke pretenduar se ndërmarrja ka qenë me humbje për vite me radhë, derisa Vetëvendosje ka ardhur në pushtet.
“Sa herë që i dëgjoni piskamat e tyne, dijeni që pa dashje ua kemi shpu me gjylpanë dorën që e kanë pasur të futur në thes, teksa kemi qenë duke e qepur thesin e shqyer. Kjo më poshtë është performanca financiare e Ibër-Lepencit në 10 vitet e fundit. Siç edhe shihet, ndërmarrja vetëm prej vitit 2022 e këtej ka filluar të operojë me fitim, kurse të gjitha vitet tjera paraprake ka operuar me humbje 3-4 milionë euro në vit”, shkroi Murati.
Ndërkohë lidhur me këtë aferën e re të Vetëvendosje, në një konferencë për media kanë dalur sot edhe nga Lidhja Demokratike e Kosovës.
