kfvanews
Një sulm i rëndë me armë zjarri tronditi Australinë të shtunën, kur 16 persona, mes tyre edhe një fëmijë 10-vjeçar, humbën jetën në zonën e Bondi Beach, në shtetin australian të New South Wales. Viktimat ishin të moshave nga 10 deri në 87 vjeç, ndërsa 42 persona të tjerë mbetën të plagosur dhe po trajtohen në spital.
Ngjarja ndodhi gjatë një aktiviteti publik për shënimin e fillimit të festës hebraike Hanukkah dhe po trajtohet zyrtarisht nga autoritetet si një akt terrorist. Sipas Policisë së New South Wales, sulmi u krye nga dy persona, babë e bir. Autori kryesor, një 50-vjeçar, u qëllua për vdekje nga policia në vendngjarje, ndërsa djali i tij 24-vjeçar u plagos rëndë dhe ndodhet në spital nën mbikëqyrje të rreptë policore.
Komisioneri i Policisë së New South Wales, Mel Lanyon, bëri të ditur se hetimet kanë përparuar dhe se nuk po kërkohen persona të tjerë të përfshirë. Ai konfirmoi se 50-vjeçari ishte posedues i licencuar i armëve të zjarrit dhe kishte të regjistruara gjashtë armë, të cilat dyshohet se janë përdorur gjatë sulmit. Gjatë natës, policia kreu kontrolle me urdhër gjykate në dy banesa në zonat Bonnyrigg dhe Campsie, në perëndim të Sydney-t, si pjesë e hetimeve.
Ndërkohë, autoritetet kanë identifikuar autorin e dytë si Khaled al-Nablusi, shtetas libanez me origjinë palestineze, i cili dyshohet se i është zotuar besnikëri Shtetit Islamik (ISIS). Ky fakt ka rritur shqetësimet për një dimension të mundshëm ndërkombëtar të sulmit dhe ka nxitur debate mbi politikat e sigurisë dhe imigracionit në Australi.
Autoritetet konfirmuan gjithashtu se dy efektivë policie mbeten të shtruar në spital, ndërsa prania e forcave të rendit është shtuar ndjeshëm pranë vendeve të kultit për arsye sigurie.
Kryeministri i New South Wales, Chris Minns, deklaroi se 15 nga viktimat ishin civilë të pafajshëm, ndërsa viktima e 16-të është një nga autorët e sulmit. Ai u bëri thirrje qytetarëve për solidaritet dhe unitet në këto momente të vështira.
Kryeministri australian Anthony Albanese e cilësoi sulmin si “të synuar kundër komunitetit hebre australian”, duke theksuar se provat që lidhin autorët me ISIS-in konfirmojnë natyrën terroriste dhe ideologjike të këtij akti të përgjakshëm, i cili shndërroi një ngjarje fetare dhe komunitare në një skenë dhune masive.
