kfvanews
Paneli Zgjedhor për Ankesa dhe Parashtresa (PZAP) ka vendosur ta pranojë ankesën e Listës Serbe dhe të certifikojë kandidatët për deputetë nga kjo parti për zgjedhjet parlamentare të 28 dhjetorit.
Në vendimin e publikuar sot, PZAP-ja ka thënë se vendimi i Komisionit Qendror të Zgjedhjeve (KQZ) për moscertifikimin e kandidatëve në mbledhjen e 10 dhjetorit është i mangët, jo i plotë dhe nuk i trajton çështjet dhe faktet vendimtare që lidhen me vlerësimin e kushteve ligjore për certifikimin e subjektit politik.
“Në mungesë të një arsyetimi të mirëfilltë ligjor konkludohet se vendimi i tillë nuk mund të qëndrojë juridikisht pasi që nuk përmban as vlerësimin e duhur të fakteve në raport me dispozitat ligjore të Ligjit për Zgjedhjet e Përgjithshme dhe me Rregulloren e Certifikimit të subjekteve politike”, thuhet në vendimin e PZAP-së.
PZAP-ja tutje ka thënë se Lista Serbe ka respektuar të gjitha afatet për regjistrimin e kandidatëve dhe ka marrë rekomandim pozitiv nga Zyra për Regjistrim, Certifikim dhe Kontroll Financiar, “prandaj e ka aprovuar ankesën”.
Kujtojmë se, Komisioni Qendror i Zgjedhjeve në mbledhjen e 10 dhjetorit, nuk e ka certifikuar listën e kandidatëve të Listës Serbe për zgjedhjet e 28 dhjetorit.
Pavarësisht rekomandimit të Zyrës për certifikim, KQZ nuk i certifikoi 33 kandidatët e kësaj partie.
Lëvizja Vetëvendosje votoi kundër. Për ishin tri vota, teksa abstenime gjashtë.
