kfvanews
Kryetari i Partisë Demokratike të Kosovës dhe kandidati për kryeministër, Bedri Hamza, dha një zotim të qartë për qytetarët, duke deklaruar se një nga vendimet e para të qeverisë së tij do të jetë rritja e pagave dhe pensioneve, përcjell Gazeta KFVA.
Hamza, në një intervistë tha se qytetarët kanë nevojë për stabilitet ekonomik dhe politika të parashikueshme.
“Qytetarët duan parashikueshmëri, çdo përkrahje e qytetarëve është e mirëseardhur, është e mirë por ata duan parashikueshmëri dhe qëndrueshmëri. Kjo nënkupton ti duhesh të rritësh pagat, dhe pagat të jenë në kontinuitet, pensionet të jenë në kontinuitet, jo me iu dhënë një ndihmë të njëhershme dhe qytetari të mos e dij kur i vjen tjetra dhe a ndodh tjetra. Përtej kësaj, kjo duhet të bëhet në kohë dhe me ligj, në procedurë ligjore, në kohë dhe me qenë të përhershme”, tha Hamza.
Ai bëri të ditur se rritja do të përfshijë të gjitha kategoritë pensionale.
“Prandaj, prej vendimeve të para ka me qenë rritja e pagave, rritja e pensioneve të të gjitha kategorive, edhe pensioneve bazike edhe atyre kontributdhënëse, edhe kategoritë e dala nga lufta, personat paraplegjikë, tetraplegjikë, viktimat e dhunës seksuale”, ka thënë Hamza.
Sipas tij, ky hap kërkon rritje të buxhetit, por Hamza theksoi se një gjë e tillë është e zgjidhshme dhe e domosdoshme për mirëqenien e qytetarëve.
