kfvanews
Që nga e hëna në mbrëmje, përleshjet janë zgjeruar në provincat e Tajlandës Surin, Buri Ram, Sa Kaeo dhe Trat, si edhe në provincat e Kamboxhias Banteay Meanchey dhe Pursat.
Të dyja palët e kanë akuzuar njëra-tjetrën për shënjestrim të zonave civile, ndërsa pretendojnë respektimin e ligjit ndërkombëtar nga ana e tyre.
Kjo vjen pasi secili vend ka akuzuar tjetrin për nisjen e dhunës të hënën.
Tajlanda ka thënë se trupat e saj janë përgjigjur ndaj zjarrit kamboxhian në provincën tajlandeze Ubon Ratchathani, duke përfshirë edhe nisjen e sulmeve ajrore përgjatë kufirit të kontestuar, ndërsa ministria e mbrojtjes e Phnom Penh-it ka thënë se ishin forcat tajlandeze ato që sulmuan të parat, në provincën kamboxhiane Preah Vihear.
Të paktën shtatë civilë kamboxhianë janë vrarë, ka thënë qeveria e saj, dhe rreth 20 të tjerë janë plagosur.
Në anën tajlandeze, tre ushtarë janë vrarë deri tani – përfshirë një ushtar që u vra nga një hedhës granatash, tha Bankoku.
Ushtria tajlandeze ka akuzuar Kamboxhian se ka përdorur sisteme raketore me shumë tytë dhe dronë bombardues në këto zona, ndërsa Kamboxhia ka akuzuar gjithashtu Tajlandën për të shtënë pa dallim në zona civile në provincën e saj kufitare Pursat.
Të martën, ish-kryeministri kamboxhian Hun Sen tha se Kamboxhia ishte kundërpërgjigjur ndaj sulmeve të Tajlandës “mbrëmë dhe këtë mëngjes”, duke pretenduar se ata kishin qenë “të durueshëm për më shumë se 24 orë për të respektuar armëpushimin”.
Kjo është përballja më serioze mes të dy vendeve që prej marrëveshjes së armëpushimit në korrik.
Armëpushimi u ndërmjetësua nga presidenti amerikan Donald Trump, i cili kërcënoi se do të ndalte negociatat për tarifat nëse nuk arrihej një armëpushim.
Trump që atëherë u ka bërë thirrje të dy vendeve të “respektojnë plotësisht” angazhimet e tyre.
Kjo mosmarrëveshje daton më shumë se një shekull më parë, që nga koha kur u caktuan kufijtë e dy vendeve pas pushtimit francez të Kamboxhias.
Kur Kamboxhia u përpoq të regjistronte një tempull të shekullit të 11-të në zonën e kontestuar si një Sit të Trashëgimisë Botërore të UNESCO-s në vitin 2008, ajo u përball me protesta të ashpra nga Tajlanda.
Gjatë viteve në vijim, këto tensione u shndërruan në përleshje sporadike në kufi, të cilat vranë dhe plagosën ushtarë nga të dyja palët.
Para përplasjeve të kësaj jave, më shumë se 40 persona u vranë në luftime të rënda në korrik, të shkaktuara nga vdekja e një ushtari kamboxhian në një përplasje kufitare.
