kfvanews
Një kamion i kompanisë rajonale “Pastrimi” ka mbetur i bllokuar në baltë tash e më shumë se një javë në fshatin Arllat të Komunës së Drenasit, duke pamundësuar edhe qarkullimin e lirë të rrugës në atë zonë.
Për nxjerrjen e kamionit është kërkuar ndihma e Forcës së Sigurisë së Kosovës, ndërsa kompania ka njoftuar gjithashtu edhe KFOR-in dhe shërbimet emergjente.
Ekipi i Gazetës sot ka qëndruar në vendin ku kamioni ka mbetur i bllokuar qe tetë ditë.
Drejtori i kompanisë “Pastrimi”, Petrit Reçica, ka bërë të ditur se kamioni ka rrëshqitur gjatë kryerjes së shërbimeve dhe ka mbetur i bllokuar për shkak të kushteve të rënda të terrenit.
“Për shkak të reshjeve të vazhdueshme, rruga është dëmtuar edhe më shumë dhe ka qenë e pamundur të largohet nga ajo pjesë. Ne jemi duke u përpjekur vazhdimisht, por fatkeqësisht edhe sot ka pasur reshje shiu,” ka deklaruar Reçica.
Ai ka theksuar se, pavarësisht situatës, nuk raportohet për asnjë punëtor të lënduar.
